ନୂଆଦିଲ୍ଲୀ, ୨୯।୬- ୨୦୦୭ରେ ଦକ୍ଷିଣ ଆଫ୍ରିକାରେ ଖେଳାଯାଇଥିବା ଟି୨୦ ବିଶ୍ୱକପ୍ର ପ୍ରଥମ ସଂସ୍କରଣରେ ଭାରତ ଚାମ୍ପିୟନ ହେବାର ସୌଭାଗ୍ୟ ଲାଭ କରିଥିଲା। ମହେନ୍ଦ୍ର ସିଂ ଧୋନୀ ପ୍ରଥମଥର ଲାଗି ଜାତୀୟ ଦଳର ନେତୃତ୍ୱ ନେବାର ସୁଯୋଗ ପାଇଥିଲେ। ଧୋନୀଙ୍କ ନେତୃତ୍ୱରେ ଯୁବ ଭାରତୀୟ ଦଳ ଦମ୍ଦାର ପ୍ରଦର୍ଶନ କରି ଫାଇନାଲରେ ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ମାତ୍ ଦେଇ ଟ୍ରଫି ହାସଲ କରିଥିଲା। ତେବେ ଭାରତୀୟ କ୍ରିକେଟ୍ର ‘ବିଗ୍ ଥ୍ରୀ’ ଭାବେ ପରିଚିତ ସଚିନ ତେନ୍ଦୁଲକର, ସୌରଭ ଗାଙ୍ଗୁଲି ଓ ରାହୁଲ ଡ୍ରାଭିଡ୍ ଏହି ଟୁର୍ନାମେଣ୍ଟରେ ଦଳରେ ସ୍ଥାନ ପାଇ ନ ଥିଲେ। କିନ୍ତୁ ଏହି ୩ ଜଣ ଖେଳାଳି ସ୍ଥାନ ନ ପାଇବାର ଏକ ରୋଚକ ତଥ୍ୟ ପୂର୍ବତନ ଭାରତୀୟ କୋଚ୍ ଲାଲଚାନ୍ଦ ରାଜପୁତ ସାମ୍ନାକୁ ଆଣିଛନ୍ତି। ରାଜପୁତ ଏକ ସାକ୍ଷାତ୍କାର ଅବସରରେ କହିଛନ୍ତି, ଯୁବ ଖେଳାଳିଙ୍କୁ ସୁଯୋଗ ଦେବା ଲାଗି ସଚିନ ଓ ଗାଙ୍ଗୁଲିଙ୍କୁ ବିଶ୍ୱକପ୍ରେ ନ ଖେଳିବା ପାଇଁ ଡ୍ରାଭିଡ୍ ଉଭୟଙ୍କୁ ବୁଝାଇଥିଲେ। ‘ହଁ ଏହା ସତ କଥା। ସଚିନ ଓ ସୌରଭଙ୍କୁ ୨୦୦୭ ଟି୨୦ ବିଶ୍ୱକପ୍ ନ ଖେଳିବା ପାଇଁ ଡ୍ରାଭିଡ୍ କହିଥିଲେ। ଡ୍ରାଭିଡ୍ ସେତେବେଳେ ଇଂଲଣ୍ଡ ଗସ୍ତରେ ଭାରତୀୟ ଦଳର ଅଧିନାୟକ ରହିଥିଲେ। ସେଠାରୁ କେତେଜଣ ଖେଳାଳି ବିଶ୍ୱକପ୍ ଖେଳିବା ଲାଗି ସିଧାସଳଖ ଦକ୍ଷିଣ ଆଫ୍ରିକାର ଜୋହାନ୍ସବର୍ଗ ଆସିଥିଲେ। ଡ୍ରାଭିଡ୍ ସେତେବେଳେ କହିଥିଲେ ଯୁବ ଖେଳାଳିଙ୍କୁ ଗୋଟିଏ ସୁଯୋଗ ଦିଆଯାଉ। ଫଳରେ ରୋହିତ୍ ଶର୍ମା, ରବିନ୍ ଉଥପ୍ପା, ୟୁସୁଫ ପଠାନ, ଯୋଗିନ୍ଦର ଶର୍ମାଙ୍କ ପରି ଯୁବ ଖେଳାଳି ବିଶ୍ୱକପ୍ ଖେଳିବାର ସୁଯୋଗ ପାଇଥିଲେ’ ବୋଲି ୨୦୦୭ ଟି୨୦ ବିଶ୍ୱକପ୍ରେ ଭାରତୀୟ ଦଳର ମ୍ୟାନେଜର ଦ୍ୱାୟିତ୍ୱ ତୁଲାଇଥିବା ରାଜପୁତ କହିଛନ୍ତି।
